Bien Monstrez, Printemps Gracieux

Bien monstrez, printemps gracieux,
De quel mestier savez servir;
Car yver fait cuers ennuyeux,
Et vous les faictes rejouir;
Si tost come il vous voit venir,
Luy et sa meschant retenue,
Sont contrains et prets de fuir,
    A votre joyeuse venue.

Yver fait champs et arbres vieux
Leur barbes de niege blanchir;
Et est si fort et pluvieux
Qu'empres le feu convient mouvir;
On ne puet hors des huys yssir,
Come ung oyseau qui est en mue;
Mais vous faictes tout revenir,
    A votre joyeuse venue.

Yver fait le soleil es cieulx
D'un mantel de nues couvrir,
Et maintenant, (loue soit Dieulx!)
Vous estes venu esclarsir
Toutes choses et embellir;
Yver a son paine perdue,
Car l'an nouvel la fait bannir,
    A votre joyeuse venue.